لیلة القدر کو بطورِ تہوار منانا

 لیلة القدر کی راتوں میں ستائیسویں رات کو  بہت اھمیت حاصل ھے لیکن بد قسمتی سے بہت سے مسلمان اس رات کو عبادت میں گزارنے کی بجائے اسے بطور تہوار  کے مناتے ہیں۔ جو کہ درست  عمل نہیں ہے ۔ کیونکہ لیلة القدر کوئی تہوار نہیں ہے، جس کو منایا جائے، بلکہ وہ ایک بہت بڑی فضیلت کی رات ہے جو ہزار مہینوں سے بھی بہتر ہے، سورة القدر کے نام سے پوری ایک سورہ قرآن پاک میں موجود ہے، بہتر ھو گا اس کا مطالعہ کیا جائے اس کی تفسیر و تشریح کو پڑھا جائے اور اسے سمجھنے کی کوشش کی جائے ، پھر یہ بھی ایک حقیقت ھے کہ  لیلة القدر کی تعیین میں بھی اختلاف  پایا جاتا  ہے کہ وہ  رمضان المبارک کی کون سی رات ہے سو رمضان المبارک کی تمام  ھی راتوں میں اس کی جستجو  کرنی چاھیے تاھم رمضان المبارک  کے اخیر عشرے کی طاق راتوں میں اس کو  خاص طور پر تلاش کرنا چاہیے، اورتلاش کرنے کا مطلب یہ ہے کہ ان راتوں میں جاگ کر انفرادی طور پر نماز، تلاوت اوردعا وذکر کا اہتمام کرنا چاہیے، رمضان المبارک کی ستائیسویں شب کو اس کا ھونا یقینی تو نہیں ھے لیکن روایات کے مطابق اس  رات میں اس کا امکان  بہرحال زیادہ ہے۔ رسول کریم صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ  رمضان ہو یا غیر رمضان برابر تہجد پڑھنے کا اہتمام فرماتے تھے اور یہ نماز (تہجد) سوکر اٹھنے کے بعد (اخیر شب میں یا درمیانی شب میں پڑھی جاتی ہے، جب رسول کریم صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ  کا معمول تہجد کا تھا تو ظاہر یہی ہے کہ ستائیسویں رمضان کی شب میں بھی آپ نے یہ نماز ضرور ادا کی ہوگی، پس تہجد کی نماز تو سنت ہے جو کم ازکم دو رکعت بھی پڑھی جاسکتی ہے، ویسے عام معمول رسول کریم صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ  کا آٹھ رکعت پڑھنے کا تھا، تہجد کے علاوہ بھی جو نماز اس رات میں پڑھی جائے وہ نفل کہلائے گی جتنی ھمت ھو پڑھ لیں لیکن خاص اس نام (لیلة القدر) سے  مروجہ دو رکعت نماز کے پڑھنے کا کوئی ثبوت نہیں، البتہ تہجد کی نماز اس نیت سے پڑھ سکتے ہیں کہ اس کو رسول اللہ صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ  نے ادا کیا ہے۔

بہرحال اس عظیم رات کو کسی طور بھی تہوار کی شکل نہیں دینی چاھیے اور حتی الامکان اجتماعی مجالس وغیرہ میں بھی شرکت سے اجتناب ھی برتنا چاھیے بلکہ انفرادی طور پر تلاوتِ قرآن پاک، نوافل اور دعاؤں میں مشغول رہ کر اس رات کو گزارنا چاھیے۔ مرد حضرات عشاء اور فجر کی نمازیں مسجد میں جا کر باجماعت تکبیرِ اولی کے ساتھ ادا کرنے کا  خصوصی طور پراھتمام فرمائیں 

اللہ پاک عمل کی توفیق عنایت فرمائے

آمین یا رب العالمین

Share: